بقلم : عبدالله الكواي
سيدي بنور البوعارة السياسيين ، المشهد السياسي عند الأغلبية ولى بحال مطرح النفايات العشوائي اولاد ناصر ، كل واحد كيقلب على فتات فقمامة شركات التدبير المفوض.
الصفقة اللي المفروض تنظف المدينة من الأزبال، ولات فحد ذاتها صفقة “موسخة” بالسمسرة، والتهافت، والتفاهمات المريبة بين بعض المستشارين والشركات.
مصادر من داخل المجلس كتقول أن بعض المنتخبين ما بقاش يهمهم الصالح العام، بل ولات كل الهمّ هو “شكون يجيب الشركة”، و”شكون يدير الصفقة”.
المدينة كتغرق في الزبل، والسياسيين كيغرقو فالمصالح!
ومع كل هاد الفوضى، كيبقى السؤال اللي كيطرحو بزاف ديال المواطنين:
واش محشمتوش؟ مفهمتوش الخطاب الملكي؟
الملك كان واضح فخطاب افتتاح الدورة البرلمانية، منين دعا المسؤولين للنزاهة، والالتزام، وخدمة المواطن قبل كل شيء.
ولكن باين أن الرسالة ما وصلاتش لبوعارة، ولا باقي بعض المنتخبين كيسمعو الخطاب ويديرو العكس!
فحين ما خاص يكون النقاش على جودة الخدمات والنظافة والشفافية، ولات السياسة فبوعارة كتقتات من نفس القمامة اللي مفروض تنظفها.